Son deseñadora, bailarina e artista. Conxugo a práctica do debuxo, o bordado e a danza co estudo do símbolo, o Texto Sacro e a tradición cristiá, de aí nútrome para dar sustento aos meus procesos creativos. O que está de fondo en toda a miña actividade é a pregunta polo humano unido ao transcendente e en constante tensión creativa. Os meus procesos de investigación vinculan o estudo teórico (que levo a cabo no Instituto de Ciencias Relixiosas de Barcelona), coa visita a diferentes templos dentro do territorio de Galicia, poñendo en relación o patrimonio coa práctica artística contemporánea. Parte destas investigacións vounas documentando no meu blog, integrando a análise do Texto Sacro coas relacións simbólicas entre natureza sacra, Románico, tradición xacobea, simbolismo do templo cristián e psicanálise. Historia e espiritualidade entrelazadas a través da arte.